Bishita Bucuti and Tara

Minister Dangui Oduber a bishita Bucuti and Tara Beach Resort y a keda impresiona cu nan preparacionnan pa cu e normal nobo.

ORANJESTAD – Dialuna atardi Minister di Turismo, Salubridad Publico y Deporte Sr. Dangui Oduber a bishita Bucuti and Tara Beach Resort bou invitacion di e Resort Manager. Tambe tabata presente tur e partnernan den turismo manera CEO di ATA, CEO di AHATA y CEO di AAA. Aki e mandatario a haya un presentacion y e mes por a encamina locual nos futuro bishitantenan lo bay presencia den e normal nobo.

Na momento cu un turista yega e resort pa prome biaha e staff lo haci preguntanan di salud y tambe lo tuma su temperatura. Den e protocolnan y proceduranan di e normal nobo hotelnan mester tene bon na cuenta locual ta e parti di higiena y tambe e distanciamento social. Pa locual ta uzo di mask esaki no ta mandatorio den e hotel. E staff ta haci uzo di mask na cierto localidadnan so rond den e hotel caminda tin contacto directo cu e bishitante, por ehempel na e spa, area di come etc.

Bucuti and Tara Beach Resort ta un resort cu ta enfoca riba turistanan cu ta pareha. Den cuadro di esaki nan a opta pa den e totalidad di e resort pa nan enfoke ta basa riba e parti di distanciamento social y pa es motibo e mask no ta mandatorio pa e bishitantenan. Por a tuma nota tambe cu tin automatic hand sanitizer dispenser den diferente area di e resort y tambe den tur e cambernan.

Pa proteha e personal di housekeeping Bucuti and Tara Beach Resort a opta pa tin UV light riba e superficie na momento cu e limpiesa ta tuma lugar. Cada camber ta ricibi un sticker na e man di porta pa indica cu e camber a keda completamente desinfecta y di e momento ey e staff no por drenta mas den e camber pa proteccion di e bishitante. Den e fitness room tambe a bin cu diferente cambionan pa cumpli cu reglanan di e normal nobo. Den e fitness room a hala e mashinnan of desconecta algun pa crea distanciamento social. Na comienso di cada dia lo desinfecta e espacio completo y durante dia cada 30 minuut lo desinfecta e mashinnan pa di e manera aki cumpli cu e parti di higiena. Den e restaurant tambe a haci algun cambio den e operacion, antes esaki tabata un unlimited buffet. Awor e restaurant a opta pa ta “limited a la carte” den e restaurant y pa servicio di camber tambe, e buffet tambe lo keda pero cu servicio limita.

Bucuti and Tara Beach Resort ta conoci pa duna bon servicio y ta e top hotel pa pareha na Aruba. Pesey na momento cu e frontera a sera e hotel a opta pa duna nan staff 3 luna di entrenamento. Segun e manager e staff ta prepara pa ricibi tur e bishitantenan den e normal nobo. Minister Dangui Oduber a keda masha impresiona di e manera cu Bucuti and Tara Beach Resort a bin ta preparando.