Hopi pais ta lucha pa cobertura universal di salud, Aruba si tin!

Minister Dangui Oduber riba dia internacional di Cobertura Universal di Salud:

Caminda hopi pais ainda ta lucha pa cobertura universal di salud, Aruba mester ta contento di tin esaki!

Ayera AZV a tene su prome  “Universal Health Coverage Event”. Riba dia internacional di Cobertura Universal di Salud ta caminda mundo henter ta enfoca pa cual hopi pais na mundo ainda ta boga pe:  Seguro Medico cu cobertura Universal den Salud. Es decir cobertura pa tur cuidadano riba e pais sin discriminacion.

Minister di Turismo, Salubridad Publico y Deporte Sr. Dangui Oduber a haci apertura di e anochi aki caminda Minister a enfatisa cu nos como cuidadano di Pais Aruba Mester ta sumemente contento di por tin Seguro Medico. Aki nan na Aruba TUR cuidadano cu ta RESIDENCIA aki ta conta cu un cobertura amplio den tratemento medico. Pues pa loke ta trata discriminacion den cobertura medico Aruba no conoce esaki. Aruba ta un ehempel mundialmente. Como asegurado nos por conta cu cuido medico na momento cu malesa bati nan nos porta. Pero pa por ofrece pueblo di Aruba e cobertura medico aki, naturalmente tin retonan cune.

Na Aruba nos mester ta mas conscientie di nos salud, enberdad nos como asegurado por conta cu cuido medico na momento cu malesa bati na nos porta pero nos como cuidadano tambe tin e tarea di ta consciente di nos estilo di bida pa evita desaroyo di malesanan cronico. Den cuadro di prevencion minister a divulga cu na comienso di aña 2020 Aruba lo conta cu un plan nacional di prevencion di NCD’s (Non Communicable Diseases). Esaki ta un plan unico pa Aruba y ta uno multisectioral den cual AZV ta un partner importante.

“Como Minister di Salud Publico mi ta compremete mi mes pa sigui traha duro pa sigui mehora nos calidad di cuido medico, sigui enfoca riba mehoracion di accesibilidad di cuido medico y mas importante pa mantene e fondo di AZV sostenibel.”

Logo Nobo di AZV

Durante e evento aki, AZV a revela nan logo nobo cu ta consisti di 3 componente: cuido di calidad, accesibilidad pa tur hende y gastonan aceptabel. E logo ta inclui tambe 4 triangulo cu ta fungi como flecha cu ora e ta mustra direccion ‘pariba’ e ta nifica e calidad di cuido mas halto posibel y ‘abou’ ta nifica cuido medico na gastonan aceptabel. E letternan “AZV” ta mescla dentro di e ronchinan den fondo ilustrando e envolvimento di AZV den e comunidad di Aruba.

Dokter di Aña nomina por medio di e AZV Rating App

Na comienso di e aña aki, Ministerio di Salubridad Conhuntamente cu AZV a introduci un rating app caminda aseguradonan por a midi e serivicio di nan dokternan di cas. Basa riba e “AZV Rating App” a nomina dos dokter di cas di aña y esakinan a keda den nomber di Dokter Aurystella Wever y Melissa Wever. Corda download bo app si bo no a haci esaki ainda.