Control riba higiena lo sigui

Minister Dangui Oduber riba control di higiena

Nos comportacion y disciplina como comunidad lo determina nos exito

Oranjestad – Manera comunidad por a tuma nota, poco poco bishitantenan ta yegando Aruba pa asina por disfruta di locual nos pais tin di ofrece. Asina diferente establecimento ta habriendo nan porta pa yama nos bishitantenan como tambe localnan bon bini. Por indica cu e apertura di nos frontera a bay den forma exitoso y a base di un colaboracion estrecho entre actor clave di sector publico como tambe sector priva. Sinembargo Minister Dangui Oduber kier enfatisa y subraya e importancia di cada persona den nos comunidad como tambe doño di establecimento pa manetene nan mes na e reglanan di higiena stipula den e decreto ministerial como tambe diferente protocol. Nos mester demostra e disciplina necesario pa por mantene nos economia activo.

Asina por informa comunidad cu dentro di poco lo sigui cu control mas severo na diferente establecimento pa medio di un task force multidisciplinario pa salvaguardia nos siguridad.

Aruba Health and Happiness Code

Un otro methodo pa salvaguardia nos seguridad ta e Aruba Health and Happiness Code. DVG pa medio di un colaboracion cu ATA ta eherciendo  control na diferente localidad cu a aplica pa e seyo. Solamente establicemento cu a haci un pre-registracion exitoso y cu a haya inspeccion positivo di departamento di DVG lo por bin na remarca pa un seyo di oro.

E prome pasonan pa crea un Aruba mas resistente a wordo tuma. Cuminsando cu un apertura exitoso di nos fronteranan. Awo hustamente e momento a yega pa nos comunidad local y international den forma estrecho refleha e disciplina y dedidacion pa progreso di nos pais dor di respeta y sigui e reglanan di higiena stipula. Pais Aruba di su banda lo percura pa e controlnan necesario pa asina salvaguardia nos siguridad nacional.

Minister Oduber ta convenci cu hunto nos lo logra e comportacion y disciplina necesario.



DOM