ORANJESTAD – E proyecto hotelero di Embassy Suites cu su 330 camber di hotel extra na Aruba, tin atencion di tanto gruponan ambiental y gobierno di Aruba. Mientras cu inoficialmente NoticiaCla a compronde di departamentonan oficial di gobierno, cu e proyecto no necesariamente ta viola e Ruimtelijk Ontwikkelings Plan (ROP), e pregunta ta mas bien si mester un proyecto asina extra. Ademas a compronde cu e proyecto mes ta uno cu ta data for di 2 aña pasa cu a ta un expansion di otro proyecto y cu lo a aplica un ‘bestemmings wijziging’ osea un cambio di destinacion. For di gobierno, e portal aki a compronde cu nan no ta sostene e proyecto aki.
GOBIERNO
Den un reaccion breve di minister di turismo Dangui Oduber na NoticiaCla, el a bisa e portal aki cu ela compronde cu tin ‘toezegging’ (compromiso) haci door di ex minister di infrastructura Benny Sevinger pa e proyecto hotelero aki. “En todo caso e gobierno actual no ta comparti e vision di sigui expande cu cambernan hotelero na gran escala” Oduber a sigui bisa e portal. “Nos kier un desaroyo balansa cu efecto minimo riba infrastructura, vivienda, fondonan di pensioen y fondonan di AZV. Nos ta desea di sigui desaroya, pero na un manera responsabel y cu desaroyonan upscale estilo Boutique Hotels pa eleva nos calidad di turismo” Oduber a finalisa bisando.
BRAND
Loke ta hala atencion tambe ta e hecho cu e nomber di Hilton ta wordo menciona, siendo cu tin un Hilton na Aruba caba. E pensamento a bin e ora, si esnan cu a bin cu Hilton, ta sea tras di e proyecto aki tambe. Di otro banda, no ta nada straño cu Hilton ta menciona ya cu ta conoci cu mescos cu e cadena Marriott tin otro ‘brands’ manera Renaissance y Ritz Carlton, Hilton tambe tin otro ‘brands’ y nan ta liber pa papia cu cualkier otro desaroyador. Den e caso aki, e informacion cu e portal aki tin ta cu e desaroyadornan aki ta Venezolano y ta presenta como e compania Natura Development, cu ta inscribi na Camara di Comercio for di 2007 caba. Tambe, nan lo a scoge e brand Embassy Suits cu ta di Hilton. Algo cu nan lo tin derecho riba dje.
HILTON ARUBA
NoticiaCla a tuma contacto cu e doñonan di Hilton na Aruba, esta Aruba Growth Fund, y nan a sigura e portal aki cu den ningun forma of estilo, nan ta envolvi den e proyecto aki. De hecho, nan no ta considera esaki como algo cu Aruba mester, of cu e ta un adicion pa Aruba. “Nos como AGF y nos partnernan no ta afilia cu e proyecto aki, y cu nos ta considera Aruba Caribbean un hotel netamente Arubiano cu ta respeta y sostene Aruba, su hendenan y su naturaleza den cualkier forma cu nos por. Como tal, nos no ta sostene ningun proyecto cu por pone e poco naturalesa precioso cu a keda, na peliger”, Rene Kan como representante di AGF a bisa e portal aki. “Nos na AGF ta di acuerdo cu gobierno cu nos mester hiba nos turismo na un otro nivel (mas halto) y no sigui añadi camber manera loco. Nos no tin e airlift, e lo costa e pagado di belasting/AZV placa so”, Kan a finalisa bisando. Intento pa tuma contacto cu e desaroyadornan, te ainda no a duna resultado, pero e portal aki lo continua cu su esfuerso.