Minister Dangui Oduber ta felicita Holiday Inn Aruba Beach Resort and Casino cu nan di 50 Aniversario.
ORANJESTAD- Diamars atardi Minister di Turismo, Salubridad Publico y Deporte Sr. Dangui Oduber tawata presente na Holiday Inn Beach Resort and Casino Aruba en conexion cu e celebracion di Holiday Inn su aniversario di oro.
Den un atmosfera ameno a conmemora 50 aña di existencia y asina Minister Oduber tabata tin e honor di por ta presente den nomber di gobierno di Aruba.
Holiday Inn Aruba a wordo construi cu 200 camber na aña 1969 y a bira e tempo ey e di tres Resort and Casino na Aruba. Den añanan 70, specificamente 1975 a expande e hotel cu 200 camber mas y asina a bira un resort di 400 camber cu a haci Holiday Inn e hotel di mas grandi cargando e titulo aki pa varios aña consecutivo. E hotel a sa di sigi desaroya exitosamente y na final di añan 80 a añadi 200 camber mas den locual awe nos conoce como “Sea Tower”. Awe e hotel ta conta cu un total di 600 camber unda ambos turista y local nan por disfruta.
Ta hopi great pa remarca cu Holiday Inn Resort Aruba ta e unico resort riba nos isla cu a sa di mantene mesun nomber y logo desde cu su portanan a habri na aña 1969.
E famia di Holiday Inn ta consisti di un total di 267 empleado di cual Sra. Irma Romney tin 44 aña trahando y Sra. Veronica Romero tin 46 aña trahando. Un danki special ta bai na e dos damanan aki cu sin niun duda tin nos turismo na pecho. Tambe un danki di curason ta bai pa tur staff y management cu a sa di dedica cu amor na nan trabou diario haciendo cu Holiday Inn por mantene tur aña riba 30% di “repeat guests”.
Nos turismo ta nos forsa di nos economia, pero nos hende nan cu traha tur dia den e sector aki ta e driver principal di nos turismo.
Minister Dangui Oduber ta manda palabra nan di Pabien na tur esnan cu di un of otro forma a contribui na e logro di 50 aña di Holiday Inn Aruba y ta desea Holiday Inn tur clase di exito pa futuro.
