Gobierno debe AZV 46 miyon florin
ORANJESTAD (AAN) – Encuanto e falta di fondo pa loke ta trata e Seguro di Maleza AZV, Gobierno a ricibi un carta for di drs. Anko Ringeling, den cual e ta relata un situacion identico na locual ATA a trece dilanti, relaciona cu placa cu no a drenta for di e Gabinete anterior.
Asina Minister Dangui Oduber, como titular di Salud Publico a declara den conferencia di prensa, Diahuebs.
E mesun historia pa motibo di falta di responsabilidad di no traspasa tur e primanan di BAZV cu ta wordo paga pa e aseguradonan y ta bay caha di gobierno, y cu, automaticamente, segun ley tambe mester wordo traspasa pa AZV, pa su maneho y pa cubri gastonan medico.
Mesun caso, unda cu di cuater pa cinco luna, un biaha mas AZV no ta ricibi su placa. Gobierno na e momentonan aki debe AZV 46 miyon florin. “Ora nos pone e institutonan cu ta resorta bao di mi ministerio hunto, nos ta papiando cu Land Aruba debe AZV 46 miyon florin, e ta debe ATA 22 miyon, kiermen casi 70 miyon florin adicional cu nos tin cu bay busca un manera pa yega na e fondonan aki pa cubri e gastonan”, Minister Dangui Oduber a subraya.
El a agrega cu e director di AZV den su carta dirigi na Minister di Salubridad cu na e momentonan aki AZV no tin placa pa paga, por ehemplo, Hospital.
Oduber ta puntra con mas iresponsable e gobierno saliente por ta di laga un situacion asina aki, pa e proximo gobierno. Si nan mes lo a gana eleccion, nan mes lo a hereda e situacion aki. “Mi ta haya un situacion sumamente iresponsable como gobernante, pa maneha un pais di e manera aki. Bo ta laga ATA den cifranan cora. Aruba ta conoci caba como un pais den bancarota” Oduber a remarca.
E minister a reitera cu gobierno anterior a laga e pais aki na werki y e ta haya importante pa trece esaki na conocemento di comunidad, pasobra e mesun hendenan aki ta hibando oposicion awe, cu e pensamento cu un dia nan lo desea di bin bek den Gobierno.
“Un Gobierno asina aki hamas y nunca por haya e oportunidad di drenta Gobierno” e dignatario a expresa agregando cu den e presupuesto supletorio e actual gobierno tin cu busca un manera creativo pa cubri e iresponsabilidadnan aki (posiblemente fia mas placa) cu gobierno di Mike Eman a laga atras. “Kiermen un gobierno asina, mi no ta kere pueblo mester duna nan oportunidad mas pa goberna e pais, pasobra nan a demostra caba kico nan a haci, kico nan a laga atras y kico nos a hereda. Pero, en todo caso, e gobierno aki tey pa tuma accion. Tin hopi reto nos dilanti, esakinan mes ta retonan financiero y nos tin cu busca e manera pa tapa e buraco pa ATA y pa AZV pa asina hospital por sigui brinda servicio y nos por keda manda nos pacientnan na exterior, ora nan mester haya e cuido medico necesario”, e dignatario a acentua.
El a agrega cu e lo tin un reunion cu Minister di Finanzas y Prome Minister, y tambe lo wordo trata den Conseho di Minister pa wak con pa yega na un solucion pa evita cu ATA ta bay den cora.
Pa finaliza Minister Oduber a enfatiza cu ATA sin fondonan no por inverti den mercadeo cu consecuencia cu no por atrae turistianan pa nos pais.
December 16, 2017