Minister Dangui Oduber Proyecto Boardwalk Malmok Fase 1 y 2 ta cla! Un promesa haci y cumpli!

Minister Dangui Oduber

Proyecto Boardwalk Malmok Fase 1 y 2 ta cla! Un promesa haci y cumpli!

ORANJESTAD – Minister di Turismo Sr. Dangui Oduber ta anuncia cu e bunita proyecto di Boardwalk Malmok a finalisa. E proyecto aki a cuminsa na februari di aña 2019 y a wordo ehecuta den 2 fase cu a wordo financia pa TPEF. E proyecto aki sigur tabata uno necesario pa trece un “upgrading” den e area di “high rise”. 

Boardwalk Malmok ta un proyecto cu prome cu eleccion di 2017 Minister Oduber a priminti comunidad di lo bay construi esaki.  Pa asina esnan cu ta haci ehercicio tin un area bunita y sigur pa nan train y alaves e ta cuadra cu vision di gobierno pa stimula comunidad pa haci movecion. Awe por bisa cu e mandatario a cumpli cu e promesa aki.

E boardwalk Malmok ta di e crusada pa bay Arashi te cu e area di Fisherman hut. E prome fase di e proyecto a consisti di 240 meter di “hard hout” y a haci uzo di klinkers tambe. A pone palonan cu reflectors cu ta separa trafico di peatonnan pa trece e seguridad necesario y a crea areanan di parkeo.

Durante e ultimo fase aki a construi den e area di peaton, un vloer di concreet sigui pa un vloer di klinker cu kolomnan, a pone mas iluminacion y a construi un boardwalk na haltura di e Fisherman hut. Tambe na e draaikom na haltura di Fisherman hut a construi un plateau di trafico cu lo conecta cu e caminda di Malmok. Esaki ta un proyecto cu a wordo presenta den campaña di aña 2013 y awo esaki a keda cristalisa. Semper un politico mester bisa loke e ta bai haci y haci loke e ta bisa.

Un otro promesa haci y cumpli!