ORANJESTAD(AAN)– Minister encarga cu Turismo, Salubridad Publico y Deporte, Sr. Dangui Oduber a tuma nota di un caso sumamente lamentabel cu a tuma lugar aña nobo, caminda un pareha turista a wordo atraca den un zona no turistico den oranan di mainta.
E caso lamentable aki tin e debido atencion di Minister Dangui Oduber y tambe di Minister di Husticia y Integracion Sr. Andin Bikker. Na momento cu e caso aki a tuma lugar tabata tin contacto continuo entre Minister Dangui Oduber, Minister Andin Bikker y tambe ATA. Tipo di sucedidonan aki sigur ta trece un experiencia amargo pa e bishitantenan aki.
Ta pesei e ta un prioridad pa gobierno di Aruba ta re-establece orden bek y garantiza siguridad na nos hendenan y nos bishitantenan. Nos tin cu conscientisa nos mes cu Turismo ta nos unico pilar economico y mester garantisa e siguridad di nos bishitantenan.
Minister Dangui Oduber ta splica cu durante e ultimo añanan di e gobierno anterior, e cantidad di atraconan riba nos turistanan a subi drasticamente y a kibra tur record.Aruba Hotel Security Foundation ta ricibi anualmente fondonan di ATA pa asina por combati criminalidad den e zona hotelero. Hunto cu Minister di Husticia tin un plan specialmente pa e zona hotelero.
“Nos a hereda un pais caminda tin un explosion social y bo ta nota esaki tur caminda. Minister Dowers a crea un chaos den su maneho y nos siguridad a bay perdi. Nunca tabata tin un plan concreto di parti e gobierno di AVP con pa atende cu e aumento drastico di atraconan. E gobierno nobo aki a pone siguridad como prioridad y tin tur atencion pa cu esaki”. Como Minister di Turismo ta nos deber y obligacion pa hunto cu Minister di Husticia mantene e destinacion Aruba como un “safe destination”.
E mandatario ta sigura cu tanten cu e ta Minister encarga cu Turismo e no lo laga e problematica aki drumi, e lo percura pa esaki wordo ataca di tur banda pa asina trece solucionnan pa termino largo.