“Na momento cu bo tende un liña di crucero prestigioso ta scoge Aruba riba otro islanan pa por keda un anochi extra den Caribe, e ta dunabo e sentimento di satisfaccion cu nos ta bayendo den e bon direccion cu nos maneho”, Minister Dangui Oduber a duna di conoce.
Dia 25 di januari awor, cual ta e mesun dia cu Aruba ta celebra Dia di Betico, Aruba lo tin un total di tres barco crucero na waf, poniendo mas cu 14 mil turista riba pia na nos isla. Inicialmente nos mester a ricibi dos barco pero a haya e grato noticia cu e barco ‘Celebrity’ kier a keda un anochi na sea Aruba, Boneiro of Corsou y nan a kies Aruba pa su bida nocturno y tambe paso tur cos ta cerca di waf pa nan pasaheronan disfruta. E barconan cu lo tey riba Dia di Betico lo ta ‘Freedom of the Seas’, ‘Disney Wonder’ y ‘Divina’, cual lo tey pa prome biaha na Aruba.
E mandatario a para keto un rato tambe riba e estudio haci door di A.T.A. cu ta mustra cu tin un crecemento di casi 9% di e averahe pa loke ta e cantidad di placa cu e turista crucero ta gasta na Aruba. Tambe e estudio ta demostra cu lo genera di un entrada di alrededor di 86 miyon dollar, haciendo 2019 un aña prometedor pa Aruba su turismo di crucero.
Finalmente Minister Dangui Oduber ta manda un palabra di felicitacion na henter e team profesional di APA, cu a demostra cu nan tin e capacidad y experencia amplio pa por acomoda e barconan aki.