ORANJESTAD (AAN): E mandatario di Salubridad Publico, Minister Dangui Oduber, ta trahando riba un plan integral pa mehora e calidad di cuido di salud y e cuido medico en general pa asina por garantisa un calidad halto di cuido y salubridad pa nos comunidad.
E mandatario lo enfoca riba diferente punto nan di accion pa resolve problemanan di salud publico, entre otro, ehecuta e plan nacional di prevencion (PNP) cu ta encera un enfoce mas directo riba un plan di prevencion proactivo, na unda ta pone enfasis riba educacion y informacion riba plannan di ehercicio (movecion) y nutricion (alimento saludabel), y alavez lo introduci un sistema di examen medico general (incluyendo dental) como parti di e pakete basico di AZV.
Lo mehora e calidad di cuido medico, door di implementa e “Landverordening Kwaliteit in de Gezondheidszorg” cu ta contene normanan di calidad pa proveedornan di cuido. Ademas lo modernisa leynan pa proteha derechonan di pashent no solamente contra mal practica medico pero tambe contra mal servicio.
Lo crea y forma mas profesionalnan den cuido medico, manera enfermeronan via nos instituto actual cu ta EPI sector di cuido y tambe den futuro lo kier bin cu un Academia di cuido aki nan na Aruba na nivel di HBO na unda nos por crea mas profesionalnan den diferente area di cuido.
Den e forma aki nos lo stimula nos hobennan pa escoge pa profesionalisa nan mes na nan mesun isla y keda aki nan pa eherce nan profesion na benificio di comunidad.
Mester aumenta e cantidad di dokternan di cas, cu actualmente tin solamente un dokter di cas pa cada 1500 pa 2000 pashent. Locual tambe sigur mester aumenta ta e cantidad di specialistanan pa di e forma aki baha e lista di espera pa servicio medico specialisa.
Un punto di accion cu sigur tin atencion di e mandatario ta nos medi conan yiu di tera cu a studia den Region, Merca y Europa. Lo bay haci un reevaluacion debido, consulta cu tur stakeholders, specialistanan y despues di esaki haci lo posibel pa implemneta e “Landsverordening Beroepen In de Gezondheidszorg” (ley di BIG).
Ta hopi importante pa inclui e profesionalnan aki den e area di salud den nos sistema di salubridad actual pa di e manera aki reforsa e cuido medico en general pa asina hisa e cantidad di dokternan y specialistanan na beneficio di comunidad di Aruba.
November 24, 2017