Minister Dangui Oduber ta haci entrega di e prome fase di SV Estrella su masterplan
ORANJESTAD – Diamars atardi Minister di Deporte Sr. Dangui Oduber conhuntamente cu Minister-President Wever Croes y coleganan di fraccion di MEP a entrega otro bunita proyecto di deporte. SV Estrella a presenta un masterplan den 3 fase y diamars atardi a tuma lugar e entrega di e prome fase di e proyecto.
Den e prome a fase a construi un bunita entrada pa e stadion di SV Estrella unda antes esaki tabata un ruina. Tambe a construi un veld di futbol mini di artificial turf pa asina mas mucha por train na mesun momento. E maneho di deporte di Minister Dangui Oduber ta entre otro basa riba mehoracion di facilidadnan Deportivo. E mandatario ta di pensamento cu tur veld na Aruba mester tin bon iluminacion y artificial turf.
SV Estrella no ta un ekipo desconoci den e deporte di futbol na Aruba. SV Estrella a competi den division di honor casi ful su existencia y a titula campeon na varios ocasion. Dos ekipo na aruba so a logra gana copa Antillano y SV Estrella tabata un di nan cu a logra e titulo aki na aña 1970. Deporte ta tene nos hobennan activo y riba e bon caminda, asina e mandatario a trece dilanti.
Gobierno ta sostene tur proyecto cu ta yuda na eleva e nivel di deporte na Aruba. Segun e Minister gobierno ta haciendo tur esfuerso pa yuda deporte, apesar di e retonan cu tin, gobierno ta sigui yuda organisacionnan deportivo por medionan creativo. Varios compleho deportivo ta hayando materialnan, lusnan LED y turf. Ya caba ta varios veld a haya nan iluminacion pa asina e ekiponan por practica parti anochi. Na final di dia ta importante pa nos stimula participacion activo di nos muchanan y hobennan den deporte.
Finalmente Minister Dangui Oduber a manda palabra di pabien y gradicimento na e directiva specialmente na presidente di Estrella Sr Denchi Werleman y tambe sr Michel Lopez, miembronan di S.V. Estrella. Minister ta hopi agradecido na tur e voluntarionan cu ta duna di nan tempo liber pa guia y desaroya nos hobenan. Esaki ta algo di aprecia pasobra ta hopi tempo y energia ta bai na tur training y wega y ta sumanente importante pa tin e voluntarionan aki cu tin curason pa deporte. Danki na bosonan pa yuda communidad den loke boso ta haci.
