Minister di Deporte, Sr. Dangui Oduber su maneho di deporte ta dirigi un gran parti ariba e mantencion di infrastructura di facilidadnan Deportivo pa asina haci deporte mas accesibel pa un y tur. Apesar cu no por conta cu e sosten di Lotto Minister di Deporte, Sr. Dangui Oduber ta trahando ariba un maneho di deporte cu ta na bienestar di e deportistanan. Den e proximo lunanan Minister Dangui Oduber ta bai invita cada un federacion deportivo pa asina scucha nan necesidadnan y pa asina yuda nan desaroya nan deporte. Arubaanse Voetbal Bond (AVB) ya caba ta e prome instancia deportivo cu a haya e chens di reuni cu Minister y delibera ariba plannan pa futuro.
Den cuadro pa aumenta e participacion den deporte di futbol especialmente bou di hende muhe, Minister por medio di IBiSA lo incorpora un maneho caminda lo intensifica e programa di futbol pa hende muhe. Esaki lo cuminsa via deporte escolar cu sosten di AVB. E aña ki lo expande e cantidad di weganan di Olimpiada Escolar den categoria di mucha muhe cuminsando cu futbol y lo continua di haci mescos pa otro deportenan.
Minister a haci palabracionnan concreto cu federacion di AVB pa insitui un comision cu ta consisti di stakeholders manera Ministerio di Deporte, AVB y demas organisacionnan goburnamental cu ta di importancia cu meta pa traha un plan encuanto construccion y mantencion di facilidadnan di futbol pa asina bin na remarke pa ricibi fondonan di FIFA.
Ta un lastima pa mira con e sentencia di Juez den e caso di lotto ta dunando forsa na instancianan concerni cu mantencion di facilidadnan Deportivo pa asina strobe desaroyonan den deporte. Aruba tin diferente facilidadnan deportivo cu ta haci falta di mantencion. Por ehempel, e veld di futbol na Guillermo prospero Trinidad awordo afgekeurd pa CONCAF. Parke Curazon na Jaburibari ta un otro facilidad masha popular pero alabez peligroso pa falta di mantencion. Sin lubida cu algun siman atras durante un wega caminda tabata tin muchanan ta practica nan deporte un palo di luz a kita cai riba veld den pleno accion di wega. Infrastructura di facilidadnan Deportivo ta den decadencia. Interes politico a prevalece riba deporte. Lamentablemente e maneho actual di Lotto no ta para tras di e proposito cu ela wordo funda pe.
Minister Dangui Oduber y AVB ta sumamente contento y satisfecho con e reunion a bay y ta mas cu dispuesto pa traha cu otro pa asina yega na un meta, cu ta na bienestar di nos deportistanan.