Nos a priminti y nos ta cumpli! Programa di Hoben Activo, Hoben Feliz ta continua e siman aki!

Minister Dangui Oduber:

Nos a priminti y nos ta cumpli! Programa di Hoben Activo, Hoben Feliz ta continua e siman aki!

ORANJESTAD - Minister di Salubridad Publico y Deporte Sr. Dangui Oduber ta anuncia cu dialuna proyecto di Hoben Activo, Hoben Feliz a continua na Sport Centrum San Nicolas y diamars na YMCA Dakota. Meta di e programa aki ta pa motiva y promove hobennan pa hiba un bida activo y saludabel door di involucra e hobennan cu actividadnan deportivo caminda nan abilidadnan social y emocional ta wordo mehora y caminda tambe e balornan humano mas importante ta wordo estableci. E proyecto aki ta bou encargo di IbiSa den bon cooperacion cu Ministerio di Salubridad Publico y Deporte.

E mandatario a conta cu e programa a cuminsa como un proyecto piloto den e bario di San Nicolas y a resulta di ta uno sumamente exitoso. Pa e motibo aki a expande e proyecto aki den e bario di Dakota cual tambe a bay hopi bon, e idea ta pa tur bario conoce e programa di Hoben Activo, Hoben Feliz. Tur esaki ta wordo haci den cuadro di e plan nacional di prevencion di salud. Esaki ta un plan cu ta trahando riba dje, den bon cooperacion cu PAHO.

Minister Oduber a menciona cu ta bay bin cu mas campañanan di conscientisacion pa haci ehercicio y asina cambia nos estilo di biba. E idea tras di esaki ta pa den futuro baha e gastonan di AZV cu ta procedente di pashentnan cu ta sufri di suco. Pesei e programa di Hoben Activo, Hoben Feliz ta invulcra den e mucha di un edad hoben pa haci deporte, movecion pa asina hiba un bida saludabel.

E programa Hoben Activo, Hoben Feliz lo ta 2 biaha pa siman y lo continua cuminsando di dialuna 20 di januari 2020 na Sport Centrum San Nicolas y diamars 21 di januari na YMCA Dakota. Muchanan entre 8 pa 13 aña por pasa libremente pa registracion cual ta completamente gratis na Sport Centrum San Nicolas Y muchanan di 8 pa 11 aña por registra na YMCA Dakota.E programa lo cuminsa 3’or di atardi y lo termina 4:30 y lo tuma lugar riba tur dialuna, diaranson na San Nicolas y diamars y diahuebs na Dakota. E siman aki na Sport Centrum na San Nicolas lo toca e deporte di futbol y na YMCA na Dakota lo toca e deporte di capoeira. Den e proximo siman nan lo tin mas deporte manera, baseball, judo, tennis y boxeo.

Minister Dangui Oduber ta sumamente contento y satisfecho cu e proyecto aki y un bes mas ta demostra cu e gobierno aki ta pone e ser humano central caminda por medio di deporte ta aporta na reduci futuro gastonan di AZV y tambe problemanan social.