Turismo crusero ta creciendo y por bira otro aña record

Minister Dangui Oduber: Turismo crusero ta creciendo y por bira otro aña record

ORANJESTAD (AAN) – Minister Dangui Oduber ta sumamente contento y alabes orguyoso cu e cifranan cu a wordo registra pa aña 2019 pa loke ta trata Turismo di nos pais te cu awor. Turismo ta keda nos unico pilar economico y e driver principal di nos economia. Danki na turismo tin progreso economico y danki na turismo miles di persona na Aruba tin un entrada pa asina por mantene nan famianan. Den e desaroyo di turismo, turismo crusero tambe ta creciendo y ta premira di bira un otro aña record. Segun e mandatario aki por mira cu e inversion di 13 miyon florin den e tugboat Colorado na april di e aña aki ta dunando su fruta.

Aña 2018 tabata un aña record den turismo crusero unda mas di 815 mil turista a bin Aruba por medio di un crusero. Segun cifranan cu a ser ricibi di e aña aki ta premira di lo surpasa e cifra di aña 2018 na final di aña. Por ehempel diamars tabata tin 3 barco crusero aden y mas di 10 mil turista crusero sin conta e trahadornan mes di e crusero, sigur un bon dia pa nos economia. E cambio por wordo sinti den turismo y tur e indicadornan ta papia pa nan mes.

E mandatario a bisa cu e meta ta pa converti e turistanan crusero den turistanan stay-over. Pa haci esaki posibel cada persona na Aruba mester duna e turista e mihor experiencia posibel pa nan bolbe regresa nos dushi isla. Pueblo mester ta consciente di e importancia di e sector turistico aki. Turismo ta nos forza, ban proteha esaki, ban keda brinda e miho servicio y trato na nos turistanan y ban haci esaki uno duradero. Finalmente Minister Dangui Oduber sigur kier a gradici tur e empleadonan di APA, tur e empleadonan cu ta labora den e industria turistico y tur esnan cu ta haciendo aña 2019 uno asina exitoso.