Cantidad di bishitante di turistanan stayover tambe ta kibra record. Riba 1.2 miyon turista a yega Aruba den 2019!
Aña 2019 tawata un aña sumamente positivo pa Turismo di Aruba. E aña por wordo considera un di e mihor añanan den historia di Turismo di nos pais. Tur e indicadornan a indica esaki. E cantidad di stayovers, e cantidad di bishitante crusero, e REV PAR, e ADR y e tourism receipt.
Minister Dangui Oduber tin e grato noticia pa comparti cu den aña 2019 Aruba su turismo a kibra record un bes mas. Segun cifranan cu a drenta di Aruba Airport Authority mas di 1.2 miyon turista a bishita nos isla. Manera ta conoci un turismo fuerte ta percura pa miles di trabou pa nos hendenan. No tin nada mas bunita pa wak con tur e dedicacion y trabou duro di tur esnan cu ta labora den e sector aki ta contribui na resultadonan positivo pa nos isla. Minister Dangui Oduber ta contento cu strategianan usa pa ministerio di turismo a duna su resultado den 2019. E mandatario semper a duna di conoce cu un di e strategianan principal ta pa diversifica turismo den diferente mercado. E mercado di merca ta keda esun principal cu a trece riba 900 mil bishitante pa Aruba sigui pa esun di Latino America y Caribe cu 155 mil. E mercado mericano a crece cu 11% compara cu aña 2018 y e mercado total di “Air Arrivals” a crece cu 3% compara cu e aña anterior. Ministerio di Turismo ya caba ta on top di e fenomeno aki door di sigui traha riba e desaroyonan cu lo bin manera Baby Beach Waterfront, Malmok Boardwalk fase 2 y e renobacion di Rodger’s Beach Piers. Tur esaki lo yuda eleva e producto Aruba pa uno competitivo compara cu otro islanan Caribense. Abase di fondonan di TPEF tambe lo sigui contribui pa contene e problematica di cacho y pushinan riba caya door di e programa Stimami Sterilisami. Un Aruba cu ta cuida y duna amor na su animalnan lo bisa hopi di nos den wowo di nos bishitantenan. Minister Oduber den 2019 tambe a yama Bon Bini na 3 chain di hotel di caliber halto cu ta Hyatt Place Airport, Boardwalk Hotel y recientemente Courtyard by Marriott.
Aña 2020 ta premira di bira otro aña sumamente exitoso pa Turismo di Aruba. Varios desaroyo positivo manera Aruba Gateway 2030, Portcity, Baby Beach Waterfront, Boardwalk Malkok Fase 2 y asina por keda menciona un lista impresionante di proyectonan cu lo crea empleo, stimula economia y crea entrada pa gobierno.
Importante pa menciona cu e vision di minister Oduber di trece turistanan di calidad ta dunando resultado. E meta ta pa trece e turistanan afluente cu tin un capacidad halto di gasta y por nota den e indicadornan cu ta logrando esaki.
Minister Dangui Oduber no tin ningun duda cu aña 2020 lo sigi pa ta uno sumamente positivo pa Aruba su turismo y ta gradici ATA, AHATA, APA y tur esnan cu di uno of otro forma ta contribui na e industria aki.
Turismo ta nos forsa y e driver principal di nos economia.