Edwin Jacobs cu ta director di SVb, durante entrevista a splica cu e parti caminda cu nan ta mas avansa den digitalisacion, a introduci dia 1 di Juli e posibilidad pa e ciudadanonan por haci peticion pa un pensioen di biehes completamente digital, sin cu tin cu presenta na oficinanan di SVB y ta mirando cu poco poco e uzo di e medio aki ta aumentando. E momento aki, alrededor di 10% di e peticionnan cu ta drentando pa AOV, pensioen di biehes e aña aki, a tuma luga mediante e website di SVB, completamente digital. 1 di Juli, a dal un paso grandi pa loke ta trata e seguro di malesa y accidente, ora cu a introduci entrante 1 di Juli e posibilidad cu companianan por inscribi nan trahadonan digitalmente, sin cu e trahado tin cu presenta na oficina di SVB. Ta ripara cu e penetracion di e innovacion aki ta canando sumamente bon. Den comienso e prome lunanan, alrededor di 5 pa 6% di e inscripcionnan nobo tabata via medio digital y ya pa lunanan di November a constata caba, yegando na un nivel di 25 pa 30% di e inscripcionnan na SVB ta tumando luga via digital. Ta sigur, tin e pleno confiansa cu den 2018, esaki lo bira un forma mas comun pa e companianan inscribi nan trahadonan y ta bayendo e ora pa otro aña, ta alcansa e 50 pa 60% di inscripcion. Pasonan chikito, pero firme y contundante pa e digitalisacion di e organisacion.
Ta mira atras riba un 2017 cu poco poco ta yegando su final, como un aña exitoso pa loke ta trata SVB, loke ta preparacion tambe pa por sirbi comunidad di Aruba na e miho forma den e añanan 20. Ta trahando fuertemente pa e organisacion ta na expectativa di su clientenan, pa den añanan 20, e servicionan ta completamente digitalisa.Pa 2018, e expectativa ta, cu lo tin mas servicio digital na disposicion di companianan y asina poco poco ta transforma den un compania cu ta bay completamente digitalisa.