Apreciabel ciudadano,
Permitimi introduci mi mes. Mi nomber ta Danguillaume Pierrino Oduber, nací 13 di Juli 1978, casa cu sra. Naliza Oduber Faarup, tata di dos yiu homber chikito, Zidane y Zander. Mi a bay scol basico na Madiki, Colegio Bon Bini, scol secundario La Salle College y Colegio Arubano, y despues sigui cu mi estudio na Hoge School In Holland na Rotterdam na unda mi a gradua como Bachelor den Economics, den Management Economics & Law na 2005.
Mi prome trabou tabata cu "HDI Verzekeringen", compania di seguro na Rotterdam. Despues di a bin biba bek na Aruba mi a labora pa 7 aña na Setar N.V., di cual 5 aña como traffic and routing analyst y 1 aña como coordinador di "inkoop en logistiek" y despues como supervisor di departamento "inkoop en logistiek".
For di mucha semper mi a practica e deportenan di tennis, futbol, beisbal y atletismo y asina siña hopi disciplina. Mi a bira campeon di tennis den categorianan sub 14, sub 16 y sub 18 y na varios occasion a representa Aruba den exterior. Den futbol mi a forma parti di e orguyonan di Noord, Bubali pa varios aña. Mi a hunga futbol den varios seleccion di pais Aruba.
Mi escogencia pa drenta politica ta pa duna mi contribucion positivo na desaroyo y bienestar di nos pais. Mi ta sinti e yamada y e compromiso pa traha pa e progreso di e pais aki y kier lucha pa e porvenir di nos futuro generacionnan. E ta un yamada pa sirbi mi pais Aruba y e yamada aki mi ta cumpli cune den e mihor forma posibel.
MEP ta un partido social-democratico cu ta lucha pa bienestar di e ser humano y ta pone esaki na prome lugar. Mi ta forma parti di MEP pasobra mi ta kere den e ideologia social-democratico di e partido aki y mi kier yuda nos pais y yuda esnan den necesidad.
Mi kier sirbi nos pais cu tur e talentonan cu nos Creador a duna mi, y contribui na felicidad di nos pueblo. Mi kier traha pa nos Aruba ta mas sigur, na unda nos por biba den tur trankilidad y harmonia. Mi kier un mihor reparticion di nos desaroyo economico, creando cuponan di trabou duradero, un mihor participacion den nos educacion cu oportunidad igual pa un y tur.
Na aña 2013 mi a drenta e arena politico y bira canadidato di e prestigioso partido Movimiento Electoral di Pueblo (MEP) y a bira parlamentario pa e fraccion di MEP den parlamento.
Na e momentonan aki mi ta forma parti di Gabinete Wever Croes como Minister di Turismo, Salubridad Publico y Deporte. Mi ta hopi agradecido pa e oportunidad aki pa por sirbi mi pais como Minister.
https://en.wikipedia.org/wiki/Dangui_Oduber