ORANJESTAD(AAN)– Minister encarga cu Turismo, Salud Publico y Deporte, Sr. DanguiOduber ta garantisa comunidad di Aruba cu e lo transforma e maneho di adiccion y problemanan mental na Aruba den un ehempel pa Caribe.
E Minister kier compromete su mes cu tur e famianan cu tin familianan den problema di adiccion of mental cu panan ta un dolor grandi, cu e lo bay restructura henter e organisacion actual y lo bai inverti mucho mas pa por trata e hendenan aki adecuadamente.
E retonan actual ta sumamente grandi, caminda cu e gobierno anterior a hasi absolutamente nada pa maneho di adiccion y problemanan mental aki na Aruba converti asina e situacion di adiccion na Aruba den uno hopi espantoso. E mal maneho pa cu adiccion y problemanan mental e ultimo 8 añanan, comunidad por a mira e frutonan di esaki den varios caso lamentabel cu a sosode e aña aki.
E mandatario di Salud Publico ta garantisa pueblo di Aruba cu e lo pone e ser humano central atrobe, pa asina cada ciudadano riba nos isla por bay disfruta di un cuido digno y di calidad. E Minister lo bay ataca e problematica di adiccion y problemanan mental di tur banda.
E retonan actual ta grandisimo den e sector aki. Na aña 2005 e fundacionnan cu tin cu maneha problema di adiccion y pa prevencion di esaki tabata haya un subsidio di alrededor di 12 miyon florin pa aña for gobierno di Aruba. For di 2010 te cu awo e fundacionnan aki ta haya solamente 3.5 miyon florin.
E gobierno anterior di Mike Eman a corta esaki cu casi 9 miyon florin cu ta equivalente na un caida di 71%. Minister Dangui Oduber ta garantisa pueblo cu esaki sigur lo cambia bou su maneho y lo bay inverti lo necesario pa asina nos por ta un ehempel locual ta regardamaneho pa cu adiccion y problemanan mental den Caribe.
Lo bay hasi un reorganisacion completo pa cu maneho di adiccion y problemanan mental pa asina esaki wordo structura na un manera profesional manera normanan internacional ta exigi.
Entre 2005 cu 2009 un total di 180 pashent tabata wordo trata pa problemanan di adiccion of mental, for di aña 2010 te cu awo esaki ta solamente 30 hende. Esey ta nifica un caida di 84% di e total di pashentnan cu tabata wordo trata.
E stadistica ey so ta bisa hopi di e mal maneho di e gobierno anterior di Mike Eman cu no a hasi nada y no tabata tin e ser humano central, su prioridadnan tabata mal fiha y esey tabata tin su consecuencianan grave pa hopi famianan na Aruba. E situacion ta asina grave cu no tin luga actualmente mas pa por rehabilita manera debe ser y esaki ta hopi alarmante.
World Health Organization tin un norma cu ta stipula cu cada pais mester por tin 1 psychiater pa cada 10.000 habitante. Actualmente na Aruba nos tin solamente 4 psychiater pa 110.000 habitante.
Den e ultimo 8 añanan di gobernacion di gabinete Mike Eman I y II, 4 fundacion a wordo lanta pero nada a wordo hasi pa cu e problematica di adiccion y problemanan mental. E unico meta cu esaki tabata tin ta pa acomoda campañadornan di partido. Esaki ta mas cu bisto via e stadisticanan actual y tambe e situacion social cu nos ta bibando den dje actualmente na Aruba. Aruba ta pasando den su peor momentonan socialmente den su historia y esey ta e resultado di mal maneho pa cu e sector ya menciona.
Loke a sorprende e Minister tambe ta e falta di personal diploma pa atende cu e problemanan di adiccion y mental. E gobierno anterior no a percura pa bijscholing di e personanan aki. Minister Dangui Oduber ta compromete su mes cu e lo bay reintroduci e programa pa cu un opleiding di “Verslavingszorgtherapeut” na un MBO niveau pa asina nos aumenta e cantidad di profesionalnan den e sector aki y tambe naturalmente pa her, om of bijscholing di e empleadonan actual di e sector ya menciona.
December 13, 2017