Minister Dangui Oduber
A percura pa haci un limpieza y basha grijs na veld di flatstone
ORANJESTAD – Desde ultimo simannan por a tuma nota di diferente veldnan rond Aruba cu ta hayando un bon limpieza. Minister di Deporte Sr. Dangui Oduber ta contento di por a cumpli cu e peticionnan haci na su persona. Apesar cu Aruba ta pasando den un situacion hopi dificil Ministerio di Deporte ta keda purba coopera y contrubui cu deporte te unda cu ta posibel.
E biaha aki a toca turno na veld di Flatstone na Piedra Plat pa haya nan limpiesa y bashamento grijs riba nan veld. Flatstone ta un veld cu ta wordo hopi uza pa entrena y pa hunga weganan deportivo di baseball y softball. Ministerio di Deporte a entrega diferente proyecto caminda a haci limpi, a verf y a drecha edificio na e veldnan.
E maneho di Minister Dangui Oduber ta dirigi ariba mehoracion di infrastructura di deporte, pa asina stimula participacion activo di comunidad den deporte. Tambe pa percura pa tin iluminacion y tambe articial turf na clubnan. Na aña 2019 veld di Flatstone a ricibi su luznan nobo estilo LED cu a yuda cu e iluminacion di e veld y na un costo hopi mas economico.
Minister Oduber ta sigur cu e trabounan haci na diferente veld, centro di bario y clubnan rond di nos isla lo duna un empuhe na principalmente nos hobennan pa practica e deporte di nan gusto den un ambiente sigur.
Nos ta sigui traha na e desaroyo positivo di deporte.
