Minister Dangui Oduber
Barconan crusero ta bek den e prome siman di juni 2021
ORANJESTAD – Minister di Turismo Sr. Dangui Oduber ta habri e siman cu un anuncio sumamente positivo pa nos turismo. E prome siman di juni 2021, Aruba lo ricibi su prome bapor crucero activo, despues cu un aña pasa e pandemia di Coronavirus a inicia. Activo, ta nifica cu e bapor ta bin cu pasahero riba dje. Durante e pandemia, Aruba a keda ricibi e bapornan crucero pero solamente cu tripulante y no turista. Awor e turistanan tambe lo cuminsa bin. Asina e minister di turismo Dangui Oduber a informa dialuna durante conferencia di prensa
Minister Oduber ta señala cu Ministerio di Turismo ta trahando cu tur instancianan pa finalisa e protocol estrictonan cu ta bay tin na momento di habri e frontera pa barconan crusero na luna di juni. Algun di e protocolnan ta entre otro cu tur pasahero mester tuma un PCR test y demostra cu esaki ta negativo prome cu subi e barco. Tambe tur pasahero y e tripulacion di e barco mester ta vacuna contra di COVID-19. Por ultimo e compania crusero no mag di bende mas di 50% na ticket di e barco su capasidad maximo, por ehempel si e barco su capasidad ta 2 mil por bende solamente mil ticket.
E prome barco cu lo yega 5 di juni 2021 lo ta di Celebrity Millenium di e liña crucero Royal Caribbean Group. E barco lo sali di Sint Maarten pa Aruba, sigui pa Curacao y Barbados.
Minister Oduber ta señala cu segun e proyeccion nan haci Aruba lo por spera di juni te cu fin di aña masomenos 54 mil turista crusero. Entre lunanan di juni pa september por spera 3 barco semanal (Carnival Cruise Lines, Royal Caribbean Cruise Lines, Norwegian Cruise Lines) cu un estimado na 20% di capasidad. Na october ta spera 2 barco semanal (Royal Caribbean Cruise Lines, Norwegian Cruise Lines) cu un estimado di 35% di capasidad. Den lunan di november y December tambe lo tin 2 barco semanal di Royal Caribbean Cruise Lines, Norwegian Cruise Lines pero ta premira cu nan lo ta 40% yen.
Hopi ta esnan cu prome cu COVID-19 tabata depende riba e turismo crusero pa gana nan pan di cada dia. Awor porfin na juni poco poco e turismo crusero tambe lo cuminsa lanta cabes bek. Minister Dangui Oduber ta hopi satisfecho cu e desaroyo aki y ta percurando pa recuperacion di nos turismo crusero tambe.
