Minister Dangui Oduber:
Reapertura di Oficina di Turismo ta marca e inicio di un era nobo di progreso pa San Nicolas
SAN NICOLAS - Desde e anochi di 25 di april 2019, cu e reapertura di e Oficina di Turismo na San Nicolas, Minister Dangui Oduber a declara e momento como un era nobo di progreso pa San Nicolas. " E deber den mira un San Nicolas nobo ta bisto. E dedicacion ta evidente. San Nicolas lo mira y sinti e cambio cu e ta desea y sin duda e merece!", e mandatario a bisa durante su desertacion na e reapertura di e oficina.
Minister Dangui Oduber a splica cu desde inicio di Gabinete Wever-Croes 1 y cu su persona a haya e mandato pa dirigi e cartera di Turismo, hopi lihe e tabata remarcabel cu e area cu por ser considera manera un joya y cu ta carga e nomber di San Nicolas, nunca a haya e atencion debido pa e por demostra kico tur e tin pa ofrece. "Mientrastanto, tur dia, ya for di oranan di mainta trempan, bo ta haya muhenan y hombernan balente di tur edad, ta sali di nan hogar aki na San Nicolas, pa bay aporta na engrandece Aruba su pilar economico mas grandi y mas fuerte, cual ta Turismo", Minister Dangui Oduber a expresa.
E mandatario a sigui splica cu pa e mesun motibo su persona ta compromete su mes pa brinda oportunidad na e mesun muhenan y hombernan aki, pa sigui engrandece nos Turismo, pero for di ey mes di cas. Minister Dangui Oduber ta sigur cu door di trece movecion turistico, lo duna San Nicolas finalmente su 'fair share' den loke ya caba el a bin ta aporta na henter Aruba. Minister Dangui Oduber: "Y mi mester bisa, cu e ta incomprendibel con un parti di Aruba cu asina hopi cultura, custumbernan unico, cuminda rico na sabor, un ambiente fantastico, hendenan caluroso y cu areanan di atraccion na unda sin duda bo ta crea memorianan pa bida, a ser neglisha. Pero awe nos ta para dilanti un direccion nobo pa San Nicolas, un aire fresco, unda cu San Nicolas porfin tambe lo sinti un cambio."
Finalmente e mandatario ta duna di conoce cu e reapertura di Oficina di Turismo na San Nicolas, ta uno di mayor importancia y ta hunga un rol clave den henter e proceso di desaroyo di San Nicolas. Desde e oficina aki, cu lo sirbi di ta un centro di informacion pa nos bishitantenan, lo promove cada un area, evento y luganan extraordinario manera San Nicolas so por ofrece. E reapertura di Oficina di Turismo na San Nicolas ta uno strategico, ya cu na e momento aki, tin diferente inversionnan cu ta canando na beneficio di e pueblo di San Nicolas.
Pa nombra algun, tin e embeyecemento y restauracion di tanto Baby Beach como Rodger's Beach. Princess Christina School ta conociendo un cambio y renobacion unico. Imsan ta hayando un upgrade, unda tambe lo explora posibilidadnan pa Turismo di medicina. Entrante fin di mei, lo duna inicio na Island Fest, cual sin duda lo bira un di eventonan mas bishita pa nos turistanan y tambe nos localnan, hayando e oportunidad pa haya un bista di kico tur San Nicolas ta ofrece. Tambe tin proyectonan di otro coleganan Minister, cual ta encera entre otro haci di e cayanan principal di San Nicolas un centro di arte y cultura, bin cu un hotel finalmente pa San Nicolas y sin lubida exploracion pa bin cu un fast ferry. "E esfuersonan aki ta wordo refleha bek cerca e comerciantenan, unda por mira cu e interes ta subiendo y mas persona ta busca e forma di inverti den San Nicolas, cu ya caba ta y lo sigui progresa."
Finalmente, Minister Dangui Oduber a gradici ATA, e comerciantenan y tur persona envolvi den henter e desaroyo di San Nicolas. "Un pabien ta bay na cada un di boso, cu e logro awe, di un inicio di era nobo di progreso pa San Nicolas! Pabien Aruba, pabien pueblo di San Nicolas!"
