Desde inicio di gobernacion di Gabinete Wever-Croes 1 na 2017, Minister Dangui Oduber como mandatario encarga cu e cartera di Salubridad Publico a duna di conoce cu hisa e calidad di cuido na Aruba ta un di su prioridadnan. Awor den 2019 e calidad di cuido aki ta conoce un otro progreso ya cu tur dunado di cuido awor ta obliga di tin un ‘klachtenregeling’.
“Antes un pashent no por a vocifera facilmente cerca un dunado di cuido su malcontento pa un servicio cu el a ricibi. Hasta si e por a entrega e keho, e dunado di cuido no tabata tin niun obligacion pa resolve esaki”, e mandatario a cuminsa ta bisa. Minister Dangui Oduber ta sigui splica cu desde 1 di januari 2019 esaki a cambia ya cu e ley di ‘Calidad di Cuido’ ta obliga tur dunado di cuido pa tin un maneho di keho. E maneho aki ta wordo controla y supervisa pa
Inspectie Volksgezondheid Aruba (IVA) y den caso cu no ta cumpli segun ley, IVA lo duna e dunado di cuido un sancion conforme ley.
Segun Minister Dangui Oduber, e idea ta pa di e forma aki e dunado di cuido mes por haya sa kico ta bayendo robes. Door di scucha e pashent, por identifica e problemanan y drechanan. E mandatario ta sostene e cambio aki den ley y ta invita tur persona cu mester di mas informacion pa acudi cerca IVA.