ORANJESTAD (AAN): E siman aki e Minister encarga cu Turismo, Salubridad Publico y Deporte, sr. Dangui Oduber a continua cu su ronda di consulta cu esnan den e tereno di Salubridad Publico. Minister Dangui Oduber a tene su promer reunion cu director di Directie Volksgezondheid, Sr. Jerry Staring.
E reunion a bay den un esfera positivo, caminda cu e Minister a comparti e vision di e gobierno nobo y tambe e vision di e Ministerio di Turismo, Salubridad Publico y Deporte.
E Minister a splica en corto su maneho na e director di Directie Volksgezondheid, cu ta dirigi riba prevencion y consecuentemente mester bin cu campañanan di concientizacion pa di e manera aki consientiza e pueblo riba e importancia di biba saludable y pa preveni mas tanto cu ta posibel.
Lo introduci un test di salud obligatorio pa tur hende na Aruba cu ta registra na censo, pa asina por haya un “nulmeting” di cada ciudadano riba nos pais.
Di e manera aki lo traha un file pa cada ciudadano y tambe asina crea statisticanan encuanto e situacion di salud general pa asina traha un maneho specifico riba e malesanan of enfermedadnan cu mas ta sobresali den nos poblacion.
Esaki ta importante pa asina cuminsa enfoca riba prevencion y pa di e forma aki hiba un maneho preventivo cu lo duna su frutonan na bienestar general di nos comunidad.
November 30, 2017