Minister Dangui Oduber a keda hopi asombra y sorprendi pa mira cu netamente miembro di parlamento di partido di AVP a bai papia di e proyecto di hospital.
Tempo Wyatt Ras tawata presidente di parlamento a nenga fraccion di MEP un reunion riba proyecto di hospital y laga nan warda mas cu 1 aña pa yama e reunion.
Awe e gobierno aki a hereda un proyecto cu stempel di AVP. Un proyecto caminda desde principio nos a anticipa loke ta pasando. Un proyecto caminda Mike Eman, Benny Sevinger y Alex Schwengle a pone nan firma abou.
E proyecto awe ta uno cu a trece hopi contratiempo. E planificacion cu a wordo aproba pa Benny Sevinger ta loke a causa cu awe nos tur tin cu bai paga 110 MIYON florin extra pa e proyecto di hospital aki. Cu e suma di placa aki nos por a construi un otro hospital na Santa Cruz of Paradera. Pero awor aki nos simplemente tin cu paga e suma adicional aki pa negligencia, falta di atencion y planificacion di parti gobierno di AVP.
Ta un hilaridad pa scucha Wyatt Ras ta papia di falta di atencion sabiendo cu ora e gobierno aki a drenta, e proyecto tawta den pleno construccion.
Tur acuerdo a wordo firma, tur huurovereenkomst a wordo firma y tambe e contrato entre SOGA y Arellano.
Nos mester recorda Wyatt Ras cu su colega Benny Sevinger a scohe pa Arellano cu a bid 36 miyon florin mas cu e otro compania.
Awe nos tin un proyecto cu lo wordo investiga pa di e forma aki nos yega na e raiz di esnan responsabel pa tur loke a bai robez den e proyecto aki.
Sra Wyatt Ras mester por sa mihor y kier hunga politica barata cu e problema di hospital cu ta afecta nos tur. Na final di dia nos tur tin cu bai paga e debe cu a wordo crea pa Mike Eman!
