Dialuna 28 januari Minister di Salubridad Publico sr. Dangui Oduber hunto cu colega Minister di Enseñansa dr. Armando Rudy Lampe a reuni cu un delegacion di Zuyd Hogeschool. Zuyd Hogeschool conhuntamente cu diferente stakeholder na Aruba, lo bay ofrece e posibilidad di sigui y caba cu e estudio di HBO-verpleegkundige aki mes na Aruba.
Minister Dangui Oduber a duna di conoce cu e ta hopi satisfecho cu pronto Aruba por brinda su profesionalnan e oportunidad pa haci e opleiding di HBO-verpleegkundige aki na Aruba mes. Nan tin e oportunidad pa mehora nan mes profesionalmente, sin cu mester bandona Aruba. Esaki ta un otro paso den mehoracion di e calidad di e cuido pero tambe e seguridad di cada asegurado, esaki ta un di metanan principal pa e Ministerio di Salubridad Publico.
E estudio riba su mes lo ta riba e nivel di HBO y lo tin un duracion di 2 aña. Cu e estudio aki e enfermera/o di MBO nivel 4 por por specialisa den “ouderen zorg” y den “clinische zorg” pues un estudio multi diciplinario y hopi practico. Algo cu sigur ta hopi importante ta cu e estudio aki lo sincronisa cu esun di EPI. Na Aruba Zuyd Hogeschool lo bay traha hunto cu Universidad di Aruba specialmente cu e Faculty of Arts & Science (FAS).
Minister Dangui Oduber a trece dilanti cu e stakeholdersnan lo bay sondia e posibilidad pa cuminsa e estudio aki na Aruba pa September 2019 pero mester tene na cuenta cu inicialmente e ta planea pa cuminsa pa september di 2020. E mandatario a agrega cu e lo ta en espera di colega Minister Lampe su aprobacion, pa asina sigui encamina e caminda pa pronto por ofrece e estudio di HBO-verpleegkunde na Aruba.
Finalmente Minister Dangui Oduber ta sigura e comunidad cu di e maneranan aki lo sigui haci esfuerso pa mehora e calidad di cuido na Aruba. Mescos cu e AruBIG nos ta haci posibel pa trece mas yuinan di tera Aruba bek, cu e estudio di HBO den enfermeria e enfermera/o tin e chens pa sigui specialisa su mes aki na Aruba. Asina nos ta trece bek e famia cu ta den exterior y nos ta duna esun cu kier studia e posibilidad pa hacie serca di su famia.
