Deporte porfin tin atencion di minister di deporte Sr. Dangui Oduber y di gobierno. Despues cu pa 8 aña largo deporte a wordo neglisha y lubida, awor tin e atencion necesario pa esaki. Minister Dangui Oduber tin su plan cu e lo desea di ehecuta den deporte. Parti di e plan aki ta pa stimula movecion y stimula deporte den tur bario na Aruba. Di e manera aki a cuminsa cu e proyecto Hoben Activo Hoben Feliz na San Nicolas. E proyecto aki a resulta di ta uno sumamente exitoso y e entusiasmo pa continua cu e proyecto aki ta hopi grandi.
Minister Dangui Oduber a tuma e decision caba cu e proyecto aki lo continua den otro barionan e aña aki. E intencion ta pa den e prome kwartaal 2019 sigui cu e programa Hoben Activo Hoben den e barionan di Dakota y Brazil. Pa e di dos parti di aña lo sigui cu Santa Cruz y Noord. E meta di e programa aki ta pa tur hoben participa na un actividadnan deportivo despues di scol. Ta hopi importante pa nos keda conscientisa y stimula nos hobennan pa move y haci deporte. Deporte no solamente ta sano y saludabel sino deporte ta siñabo responsabilidad, disciplina y ta tene muchanan for di caya.
E proyecto na San Nicolas a cuminsa cu apenas 3 mucha y awor nos ta riba 30 mucha. Esaki caba ta muestra di ta un Proyecto exitoso. Minister Dangui Oduber ta kere den nos hobennan, ta kere den futuro di e siguiente generacion y kier stimula y pusha deporte mas cu e por pa asina esaki por duna e resultado desea.
Minister Dangui Oduber ta hopi enfoca riba un maneho di prevencion y di un pais saludabel y e programa aki ta fit perfectamente den e vision cu minister tin.
Pronto lo bai anuncia cual ta e fechanan cu e programa aki lo sigui den Dakota y Brazil y di awor caba ta invita tur e hobennan den e barionan aki pa participa activamente na e programa.