3 January, 2018
Un di e problemanan cu a hereda como gobierno nobo, cu a haya den e situacion cu tin varios camber di hotel cu a wordo comprometi. Segun minister di Salubridad Publico, Deporte y Turismo, Dangui Oduber, por a mira Embassy Suites cu ta 360 camber, cu como Gobierno nobo no por haci nada cu n’e.
Tierra del SolNan a haya toezegging, bouwvergunning, tur vergunning necesario pa construi un hotel. A hereda un hotel banda di Do It Center tambe. Tin un tereno disponibel cu ta habri na e momentonan aki, pero tin bouwvergunning, hotelvergunning pa un otro 120 camber. Tin un otro proyecto na Arashi cu tambe tin toezegging cu a duna di mas di 200 camber. Como Gobierno nobo a hereda sigur mas cu 1000 camber di hotel. E espacio cu abo tin como gobierno nobo pa bin cu inversionnan nobo ta hopi limita y pesey a bisa cu ta boga pa mas desaroyo. Pero kier desaroyonan riba escala chikito. Hopi chikito. Hotelnan di 50 pa 75 camber, y no mas. Loke a hereda, ya caba bo no por expande hopi mas riba esey. No por para e proyectonan aki pasobra bo ta hayabo cu casonan den corte, y por perde pasobra ta vergunningnan cu a hereda di gobierno anterior. No cu ta desea esakinan pero nan ta un hecho caba. No por haci absolutamente nada cu nan. Pesey ta bay scoge e desaroyonan cu kier. E mester ta un desaroyo di berdad cu ta eleva bo calidad, bo producto turistico, sino bo no ta para tras di esaki. Ta pesey, Oduber ta cauteloso pa anuncia cualkier proyecto nobo. Di berdad e mester ta un proyecto cu ta un added value pa pais Aruba, manera cu den pasado cu a bin cu Ritz Carlton, cual ta un di e miho hotelnan na Aruba. Productonan asina ta busca, pero riba un escala mas chikito.
Tin inversionistanan cu kier inverti den un hotel na Tierra del Sol. Algo cu a wordo stroba hopi door di gobierno anterior y sin e hotel aki, e luga aki no por existi, garantisa trabao na mas cu 100 trahado. Minister Oduber a splica cu esey ta un di e hechonan cu tin cu Tierra del Sol, pasobra si no bin un inversion eynan den un proyecto hotelero, probablemente sigur Tierra del Sol mester sera su portanan cu consecuencia cu mas di 100 trahado lo perde nan trabao. A haya un presentacion di e proyecto aki y hunto cu Minister di Infrastructura ta deliberando cua ta e miho opcion pa e proyecto aki, pa por yega na un salida satisfactorio pa inversionistanan tambe, pa e pueblo di Aruba y tambe pa gobierno di Aruba pa asina por presenta e proyecto. Pero na e momentonan aki ningun decision a wordo tuma pa ni minister di infrastructura, ni e minister di turismo. Na final di dia tin cu como ministerio ta duna hotelvergunning. Niun vergunning a wordo duna, pero tin discusionnan andando pa mira kico ta e futuro di Tierra del Sol, mirando cu tin un proyecto hotelero cu tin toezegging cu a wordo duna pa Gobierno anterior y un decision final mester wordo tuma.